Earth Core - 2 Year Younger

ကမ္ဘာ့အတွင်းပိုင်း (Core) က ကမ္ဘာကြီးရဲ့ မျက်နှာပြင် ထက် ၂ နှစ်ခွဲ ပိုငယ်နေပါတယ်

ကမ္ဘာကြီးရဲ့ မျက်နှာပြင်က အတွင်းပိုင်းအနှစ် (Core) ထက် အသက်ပိုကြီးနေတယ်ဆိုတာ ယုံနိုင်ပါသလား။ မဖြစ်နိုင်ဘူးလို့ ထင်စရာရှိပေမယ့် တွက်ချက်မှုအသစ်တွေအရ ကမ္ဘာ့အတွင်းပိုင်းဟာ ကျွန်တော်တို့နေထိုင်ရာ အပေါ်ခွံထက် ၂ နှစ်ခွဲတိတိ အသက်ငယ်နေတယ်လို့ ဆိုပါတယ် ။

ဘယ်လိုလုပ်ပြီး ဖြစ်နိုင်မှာလဲ (The Core Concept)

ဒါဟာ Einstein (အိုင်းစတိုင်း) ရဲ့ General Relativity (ယေဘုယျနှိုင်းရသီအိုရီ) ကြောင့် ဖြစ်ပါတယ်။ ဒီသီအိုရီအရ ဆွဲငင်အား (Gravity) များတဲ့နေရာမှာ အချိန်ကုန်ဆုံးမှုက နှေးကွေးသွားပါတယ် ။

ရှင်းအောင်ပြောရရင် -

အရာဝတ္ထုတစ်ခုက ထုထည်ကြီးလေလေ၊ ဆွဲငင်အားပြင်းလေလေ၊ သူ့နားမှာ အချိန်ကုန်တာ နှေးလေလေ ဖြစ်ပါတယ် ။ ကမ္ဘာ့အလယ်ဗဟို (Core) က အပေါ်ယံခွံထက် ထုထည်ပိုကြီးပြီး သိပ်သည်းဆများတာကြောင့် ဆွဲငင်အား (Gravitational Potential) ပိုများပါတယ် ။ ဒါကြောင့် ကမ္ဘာ့ဗဟိုမှာရှိတဲ့ နာရီတစ်လုံးဟာ မျက်နှာပြင်ပေါ်က နာရီထက်စာရင် တရွေ့ရွေ့နဲ့ နောက်ကျကျန်နေမှာ ဖြစ်ပါတယ် ။

ဥပမာအားဖြင့် GPS ဂြိုဟ်တုတွေဟာ ကမ္ဘာ့ဆွဲငင်အားနဲ့ ဝေးရာမှာရှိတဲ့အတွက် သူတို့ဆီက နာရီတွေက ကမ္ဘာမြေပြင်က နာရီတွေထက် ပိုမြန်နေတတ်ပါတယ် ။

အရင်တုန်းက နာမည်ကျော် ရူပဗေဒပညာရှင် Richard Feynman က ကမ္ဘာ့ဗဟိုဟာ ရက်ပိုင်းလောက်ပဲ ပိုငယ်မယ်လို့ ခန့်မှန်းခဲ့ဖူးပါတယ် ။ ဒါပေမဲ့ ဘယ်သူမှ သေသေချာချာ တွက်ချက်အတည်ပြုတာမျိုး မရှိခဲ့ပါဘူး ။

ဒိန်းမတ်နိုင်ငံ Aarhus University က ရူပဗေဒပညာရှင် Ulrik Uggerhøj ဦးဆောင်တဲ့ အဖွဲ့က ဒီကိစ္စကို အသေးစိတ် ပြန်တွက်ချက်ခဲ့ကြပါတယ် ။ ကမ္ဘာ့ဗဟိုဟာ မျက်နှာပြင်ထက် တစ်စက္ကန့်မှာ ၀.၀၀၀၀၀၀၀၀၀၃ စက္ကန့် (0.0000000003 seconds) ပိုပြီး နှေးနေပါတယ် ။ ဒီကိန်းဂဏန်းက အရမ်းသေးငယ်တယ်လို့ ထင်ရပေမယ့် ကမ္ဘာ့သက်တမ်း ၄.၅ ဘီလီယံနဲ့ မြှောက်လိုက်တဲ့အခါ စုစုပေါင်း ၂.၅ နှစ် (2.5 Years) ကွာခြားသွားတာကို တွေ့ရှိခဲ့ပါတယ် ။

ဒီတွေ့ရှိချက်ကို European Journal of Physics မှာ ဖော်ပြထားပါတယ် ။ ဒါဟာ လက်တွေ့စမ်းသပ်လို့ရတဲ့ အရာမဟုတ်ပေမဲ့၊ အိုင်းစတိုင်းရဲ့ General Relativity သီအိုရီဟာ စမ်းသပ်မှုတိုင်းမှာ မှန်ကန်ကြောင်း သက်သေပြခဲ့ပြီးဖြစ်လို့ ဒီတွက်ချက်မှုဟာလည်း မှန်ကန်နိုင်ချေ အလွန်များပါတယ် ။

ဒီတွေ့ရှိချက်က ကျွန်တော်တို့ နေ့စဉ်ဘဝကို ပြောင်းလဲသွားစေမှာ မဟုတ်ပါဘူး။ ဒါပေမဲ့ ဆွဲငင်အား (Gravity) က အချိန် (Time) ကို ဘယ်လောက်ထိ သက်ရောက်မှုရှိစေလဲဆိုတာ ထင်ရှားတဲ့ ဥပမာတစ်ခုပါပဲ။ နေ (Sun) မှာဆိုရင် ဒီထက်ပိုဆိုးပြီး နေရဲ့ ဗဟိုက မျက်နှာပြင်ထက် နှစ်ပေါင်း ၄၀,၀၀၀ (40,000 years) ပိုငယ်နေပါတယ် ။

အချိန်နှေးတယ်ဆိုတာ ဘာကိုပြောတာလဲ?

အချိန်နှေးတယ်ဆိုတာ နာရီစက်ယန္တရားကြီး လည်ပတ်တာ နှေးကွေးသွားတာမျိုး မဟုတ်ပါဘူး။ ဒါဟာ 'နှိုင်းရ' (Relative) သဘောတရား ဖြစ်ပါတယ်။ ဥပမာ - ကမ္ဘာ့ဗဟို (Core) မှာ ရှိနေတဲ့လူက သူ့နာရီသူ ကြည့်ရင် ပုံမှန်အတိုင်း တစ်စက္ကန့်ချင်း ရွေ့နေတာကိုပဲ မြင်ရမှာဖြစ်ပြီး သူ့နှလုံးခုန်သံ၊ သူ့လှုပ်ရှားမှုတွေဟာလည်း ပုံမှန်အတိုင်းပါပဲ ။ ဒါပေမဲ့ ကမ္ဘာ့မျက်နှာပြင်ပေါ်က လူကသာ အဲဒီလူကို မှန်ပြောင်းနဲ့ လှမ်းကြည့်မယ်ဆိုရင်တော့ ဟိုဘက်က လူရဲ့ လှုပ်ရှားမှုတွေဟာ ရုပ်ရှင်အနှေးပြကွက် (Slow Motion) လို ဖြစ်နေတာကို တွေ့ရပါလိမ့်မယ် ။ ဒါဟာ မျက်လှည့်ပြကွက် မဟုတ်ပါဘူး။ Einstein ရဲ့ နှိုင်းရသီအိုရီအရ ဆွဲငင်အား (Gravity) များတဲ့နေရာမှာ အချိန်စီးဆင်းမှု ကိုယ်တိုင်က ဆွဲဆန့်ခံရပြီး နှေးကွေးသွားတာဖြစ်လို့ ၊ အဲဒီနေရာမှာ နေထိုင်သူဟာ အပြင်ဘက်ကလူထက်စာရင် အသက်ကြီးတာ (Aging) ပိုနှေးကွေးပြီး အသက်ပိုငယ်နေမှာ ဖြစ်ပါတယ် ။

Source: ScienceAlert

#ScienceMyanmar #PhysicsFacts #GeneralRelativity #EarthScience #TimeDilation #SpaceTime #MyanmarKnowledge #ဗဟုသုတ